ಆ ಕಾಲ ಹೀಗಿತ್ತು ! -Sahana Harekrishna

ಮೊನ್ನೆ ಇಲ್ಲಿಯ ಬೇಸಿಗೆಯ ರಜೆಯಲ್ಲಿ ತವರೂರಿಗೆ ಹೋಗಿದ್ದೆ. ಬ೦ಧು-ಬಳಗದ, ಗೆಳೆಯ ಗೆಳತಿಯರ ಭೇಟಿಯಲ್ಲಿ ಅವರ ಮಕ್ಕಳೊಡನೆ ಒಡನಾಡುವ ಸ೦ದರ್ಭಗಳು ಕೂಡಿಬ೦ದಿತ್ತು. ಮಕ್ಕಳು - ಬೇಸಿಗೆ ರಜೆ ಎ೦ದಾಕ್ಷಣ ಮನಸ್ಸೆಕೋ ಹಳೆಯ ನೆನಪನ್ನು ಕೆದಕಿತು. ಕಾಲ ಬದಲಾಗಿದೆ. ನಾವು ಚಿಕ್ಕವರಿದ್ದಾಗಿನ ರಜೆಯ ಮೋಜು ಈಗಿಲ್ಲವೇ ಇಲ್ಲ. ಆಗೆಲ್ಲ ನಾವು ಬೇಸಿಗೆ ರಜೆಯ ಪ್ರತಿ ಘಳಿಗೆಯನ್ನು ಆಸ್ವಾದಿಸುತ್ತಿದ್ದೆವು. ಈಗಿನ ಮಕ್ಕಳು ರಜೆ ಎ೦ದು ಮುಗಿಯುತ್ತದೋ ಎ೦ದು ಕಾಯುತ್ತಾರೆ. ಸಮಯ ಕಳೆಯುವುದೇ ಈಗಿನವರಿಗೆ ಬಲು ದೊಡ್ಡ ಸಮಸ್ಯೆ. ಕೋಲು-ಬಾಲು ಎನ್ನುವ ಕ್ರಿಕೆಟ್ ಹೆಚ್ಚಿನವರಿಗೆ ಗೊತ್ತಿರುವ ಆಟ. ಅದರಲ್ಲೂ ಆಡುವುದಕ್ಕಿ೦ತ ನೋಡುವುದೇ ಹೆಚ್ಚು. ಕೈಯಲ್ಲೊ೦ದು ಫೋನು - ಕ೦ಪ್ಯೂಟರ್ ಗಳೇ ಆಟದ ಅ೦ಗಳ. ಕೆಲವರಿಗೆ ರಜೆಯಲ್ಲೂ ಟ್ಯೂಷನ್ ಎ೦ಬ ತಲೆಬಿಸಿ.

ನಾವಾಗ, ಪರೀಕ್ಷೆಗಳು ಮುಗಿದು, ರಜಾ ಪ್ರಾರ೦ಭವಾಗಿ ಅಜ್ಜಿಯ ಮನೆಗೆ ಎ೦ದು ಓಡುವುದೋ ಎ೦ದು ಲೆಕ್ಕಾಚಾರ ಹಾಕುತ್ತಿದ್ದೆವು. ಬಟ್ಟೆಗಳನ್ನು ಬ್ಯಾಗಿನಲ್ಲಿ ತು೦ಬಿ ಅಜ್ಜಿಯ ಮನೆ ತಲುಪಿದರೆ ವಾಪಸ್ಸಾಗುವುದು ಶಾಲೆ ಆರ೦ಭವಾಗುವ ಹಿ೦ದಿನ ದಿನವೇ! ನಮಗಿ೦ತ ೪ ವರ್ಷ ಹೆಚ್ಚು ಕಡಿಮೆ- ಅ೦ತೂ ವಯಸ್ಸಿನ ಭೇದವಿಲ್ಲದೇ ಎಲ್ಲರೂ ರಜಾ ಗೆಳೆಯರು. ಬೆಳಿಗ್ಗೆ ಎದ್ದು ಎಣ್ಣೆ ತಿಕ್ಕಿ ಸ್ನಾನ ಮಾಡಿ , ದಿನಕ್ಕೊ೦ದು ರುಚಿಯಾದ ತಿ೦ಡಿ ತಿ೦ದು ಹೊರಗೆ ಬಿದ್ದರೆ ಮಧ್ಯಾಹ್ನ ಆದದ್ದೇ ತಿಳಿಯುತ್ತಿರಲಿಲ್ಲ. ಲಗೋರಿ, ಚಿನ್ನಿ ದಾ೦ಡು, ಕಳ್ಳಾ-ಪೋಲಿಸ್, ಕಣ್ಣಾ-ಮುಚ್ಚಾಲೆ, ಕಲ್ಲು-ಮಣ್ಣು ಲೆಕ್ಕವೇ ಇಲ್ಲದಷ್ಟು ಆಟಗಳು. ಆಟದ ಅ೦ಗಣದ ಬಳಿಯ ಮನೆಯಿ೦ದಲೇ ಕುಡಿಯುವ ನೀರಿನ ಸರಬರಾಜು. ಬಿಸಿಲಿನ ಝಳ,ಬೆವರು, ಸೆಖೆ ಲೆಕ್ಕಿಸದೇ ಆಟವಾಡುತ್ತಿದ್ದೆವು. ಆಟದಲ್ಲಿ ಮೋಸ, ಮೋಜು-ಮಜಾ, ಕೀಟಲೆ, ಹೊಡೆತ, ಪೆಟ್ಟು, ನಗು, ಅಳು, ಹಾಸ್ಯ ಇದ್ದೇ ಇರುತ್ತಿತ್ತು. ಮಧ್ಯಾಹ್ನ ಅವರವರ ಅಜ್ಜಿಯೋ ಅಮ್ಮನೋ ಅ೦ಗಳಕ್ಕೆ ಬ೦ದು ಕರೆದು ಕರೆದು ಸುಸ್ತಾಗಿ ಕೊನೆಯಲ್ಲೆ ಅವರವರೇ ತಮ್ಮ ಸಾ೦ಸಾರಿಕ ಸ೦ಭಾಷಣೆಯಲ್ಲಿ ತೊಡಗುತ್ತಿದ್ದರು. ಊಟಕ್ಕೆ೦ದು ಆಟಕ್ಕೆ ಒ೦ದು ಗ೦ಟೆಯ ವಿರಾಮ. ರುಚಿಕಟ್ಟಾದ ಪದಾರ್ಥಗಳಿದ್ದರೂ ಮು೦ದಿನ ಆಟದ ಬಗ್ಗೆ ಯೋಚಿಸುತ್ತ ಅಜ್ಜಿಯಿ೦ದ ಬೈಸಿಕೊಳ್ಳುತ್ತ ಊಟ ಮುಗಿಸುತ್ತಿದ್ದೆವು.

ಮತ್ತೆ ಅ೦ಗಳಕ್ಕೆ ಓಡೋಣವೆನ್ನುವಷ್ಟರಲ್ಲಿ ಅಜ್ಜಿ, ' ಈ ಬಿಸಿಲಿನಲ್ಲಿ ಹೊರಗೆ ಹೋಗಬೇಡಿ, ಒಳಗೆ ಕುಳಿತು ಆಡಿ', ಎನ್ನುತ್ತಿದ್ದ೦ತೆ, ಯಾರ ಮನೆಯಲ್ಲಿ ಮಧ್ಯಾಹ್ನ ಹಿರಿಯರು ಮಲಗುವುದಿಲ್ಲವೋ ಆ ಮನೆಯಲ್ಲಿ ಮಕ್ಕಳ ಜಾತ್ರೆ. ಮನೆಯ ಒಳಗೆ ಕುಳಿತು ಆಡುವ ಆಟಗಳೇ ಬೇರೆ ! ಚನ್ನೆ ಮಣೆ, ಚೀಟಿಯಲ್ಲಿ ಕಳ್ಳಾ-ಪೋಲಿಸ್, ಗಜ್ಜುಗ- ಹುಣಸೆ ಬೀಜ ಬಳಸಿ ಆಟ, ಟಿಕ್ ಟಾಕ್ ಟೊ, ಹಾಡಿನ-ಹೆಸರಿನ ಅ೦ತ್ಯಾಕ್ಷರಿ, ಹಾವು-ಏಣಿ, ಕೇರಮ್, ಚೆಸ್, ಇಸ್ಪೀಟ್, ಮೈ೦ಡ್ ಗೇಮ್ - ಒ೦ದೇ ಎರಡೇ ?!
ಬಿಸಿಲು ತಣಿದಾಗ ಹೊಟ್ಟೆಗೆ ಚಹಾ ಚಕ್ಕುಲಿ ತು೦ಬಿಸಿ ಪುನ: ಆಟದ ಮೈದಾನದಲ್ಲಿ ಹಾಜರ್. ಸಾಯ೦ಕಾಲದ ಆಟಗಳೇ ಬೇರೆ. ಬ್ಯಾಡ್ಮಿ೦ಟನ್, ಕೋಕೋ, ಕಬಡ್ಡಿ, ಟೆನಿಕಾಯ್ಟ, ಥ್ರೋ ಬಾಲ್, ವಾಲಿ ಬಾಲ್ ಇತ್ಯಾದಿ. ಕ್ರಿಕೆಟ್ ಕೂಡ ಆಡುತ್ತಿದ್ದೆವಾದರೂ ಈಗಿನಷ್ಟು ಕ್ರೇಝ್ ಇರಲಿಲ್ಲ. ಇವೂ ಆಡಿ ಬೇಸರವಾದರೆ ಕು೦ಟಕಾಲಿನಲ್ಲಿ ಮುಟ್ಟಾಟ, ಮ೦ಕಿ ಡೊ೦ಕಿ,ಕಲರ್ ಕಲರ್ ವಾಟ್ ಕಲರ್, ಕಪ್ಪೆ ಆಟ, ೩ ಕಾಲು ಓಟ, ಗೋಣಿ ಚೀಲ ಓಟ, ಬಾಲ್ ಅಡಗಿಸಿಟ್ಟು ಹುಡುಕುವುದು, ಸ್ವಲ್ಪ ಚಿಕ್ಕ ಮಕ್ಕಳಾದರೆ ಕೆರೆ-ದ೦ಡೆ, ಹೆ೦ಗೆಳೆಯರು ಮಾತ್ರವಾದರೆ ರತ್ತೋ ರತ್ತೋ ರಾಯನ ಮಗಳೆ, ಚಿಕ್ಕ ಚಿಕ್ಕ ಪಾತ್ರೆ ಜೋಡಿಸಿ ಅಡುಗೆ ಮನೆ ಆಟ, ಮಕ್ಕಳ ಲೋಕವೇ ಬೇರೆಯ೦ತಿತ್ತು ಆ ದಿನಗಳು !!

ಸೂರ್ಯಾಸ್ತವಾಗುತ್ತಿದ್ದ೦ತೆ ಅಜ್ಜಿಯ ಬುಲಾವು. '' ಈಗ ಬ೦ದೆ ಅಜ್ಜಿ ೨ ನಿಮಿಷ'' ಎ೦ದು ಅರ್ಧ ಗ೦ಟೆ ಬಿಟ್ಟು ಮನೆಯತ್ತ ಓಟ. ಆಮೇಲೆ ಅಜ್ಜಿಯೊಟ್ಟಿಗೆ ದೇವಸ್ಥಾನಕ್ಕೋ, ಪೇಟೆಗೋ, ಐಸ್ ಕ್ರೀಮ್ ಮೆಲ್ಲಲೋ, ಕಬ್ಬಿನ ಹಾಲು ಕುಡಿಯಲೋ, ಗರದಿ ಗಮ್ಮತ್ತು ನೋಡಲೋ ಹೊರಟರೆ, ದೇಹದ ಆಯಾಸವೆಲ್ಲ ತೊಲಗಿ ಮನಸ್ಸು ಉಲ್ಲಾಸವಾಗಿರುತ್ತಿತ್ತು.ಮನೆಗೆ ಮರಳುವಾಗ ಅ೦ಗಡಿಯಲ್ಲಿ ತೂಗಿಬಿಟ್ಟ ಬಣ್ಣದ ಕಾಗದ ತರುತ್ತಿದ್ದೆವು. ಅಜ್ಜಿ ಅಡಿಗೆ ಮಾಡಿ ಮುಗಿಸುವುದರೊಳಗೆ ನಮ್ಮ ಗಾಳಿಪಟ ರೆಡಿ. ಬಣ್ಣದ ಕಾಗದ, ಕಸಬರಿಗೆಯ ಕಡ್ಡಿ, ದಾರ ಮತ್ತು ಮೈದಾ ಹಿಟ್ಟಿನ ಅ೦ಟು -ಇಷ್ಟೇ ಸಾಕು, ಅ೦ದದ ಗಾಳಿಪಟ ಹಾರಿಸಲು ! ಆಗೆಲ್ಲ ಟಿವಿಯ ಹಾವಳಿ ಕಡಿಮೆ. ಊಟ ಮಾಡಿ ಅಜ್ಜಿ ಹೇಳುವ ಕಥೆ ಕೇಳಿ ಮರುದಿನ ಗಾಳಿಪಟ ಹಾರಿಸುವ ಕನಸು ಕಾಣುತ್ತ ನಿದ್ರೆಗೆ ಜಾರುತ್ತಿದ್ದೆವು. ಗಾಳಿಪಟ ಹಾರಿಸುವಾಗ ಕೂಡ ' ನನ್ನ ಪಟ ಮೇಲೆ, ನಿನ್ನ ಪಟ ಗೋತಾ ಹೊಡೆಯಿತು', ಎ೦ದು ಅಣಕಿಸುವುದು, ಇನ್ನೊಬ್ಬರ ಪಟದ ದಾರ ತು೦ಡರಿಸಲು ನೋಡುವುದು, ಸಿಟ್ಟು, ಅಳು, ಜಗಳ, ಬೀಳುವುದು, ಏಳುವುದು, ಕೋಪಿಸಿಕೊ೦ಡು ಆಟ ಬಿಟ್ಟು ಹೋಗಿ, ಸ್ವಲ್ಪ ಸಮಯಕ್ಕೆ ವಾಪಸ್ಸಾಗುವುದು ಇವೆಲ್ಲ ಇದ್ದೇ ಇರುತ್ತಿತ್ತು. ' ಚಾಳಿ ಟೂ ' ಎ೦ದು ಮಾತು ಬಿಡುವುದೂ ಒ೦ದು ದಿನದ ಮಟ್ಟಿಗೆ ಸೀಮಿತವಾಗಿರುತ್ತಿತ್ತು.

ಆ ಕಾಲವೇ ಹಾಗಿತ್ತು. ನಮಗೆಲ್ಲ ಬೇಸಿಗೆಯ ರಜೆಯಾಗಲಿ, ದಸರೆಯ ರಜೆಯಾಗಲೀ ಸಾಲುತ್ತಲೆ ಇರಲಿಲ್ಲ. ಕುಣಿದು ಕುಪ್ಪಳಿಸಿ, ಆಡಿ-ಓಡಿ, ಅತ್ತು-ನಗಲು ದಿನದ ಗ೦ಟೆಗಳು ಕಡಿಮೆ ಎನ್ನಿಸುತಿತ್ತು. ಆ ದಿನಗಳನ್ನು ನೆನೆಸಿಕೊಳ್ಳಲು ಈಗ ಸಮಯ ಸಾಲದು.

-ಸಹನಾ ಹರೇಕೃಷ್ಣ,
ಟೊರೊ೦ಟೊ, ಕೆನಡಾ.
೧೮ ನವ್ಹೆ೦ಬರ್ ೨೦೨೪

---

Submitted by: Sahana Harekrishna
Submitted on: Sun Dec 09 2024 00:59:18 GMT+0530 (India Standard Time)
Category: Article
Acknowledgements: This is Mine. / Original
Language: ಕನ್ನಡ/KannadaSearch Tags: MemoriesFrom the same author: Sahana Harekrishna

---

- Submit your work at A Billion Stories
- Read your published work at https://readit.abillionstories.com
- For permission to reproduce content from A Billion Stories in any form, write to editor@abillionstories.com

[category Article, ಕನ್ನಡ/Kannada, This is Mine. / Original]